مرض السعار او داء الكلب

بسم الله الرحمن الرحيم…
#السعار #rabies_virus
قبل ما هابدا كلامي لازم انبهكم ان البوست طويل جداا ..  ولكنه في غايه الاهميه و لازم كل مربي كلاب او قطط يكون عارف الكلام دا كويس جدا..
………….. …………….. ……………… ………….. ……………
 قبل اي كلام لازم نعرف ان السعار دا فيرس و عدوي زي اي عدوي مش حاجه الكلب بيتولد بيها او بيكتسبها منه لنفسه كدا.. دي عدوي و ليها شروط علشان تحصل… هانمشي الموضوع سؤال و جواب
…………
ايه هي الكائنات اللي يقدر يعديها السعار؟
كل الكائنات ذوات الدم الساخن اللي طبعا منهم الانسان و الكلب و القطه.
…………
طيب ازاي يا دكتور السعار بيتنقل ؟
 بص يا سيدي الحيوان المسعور الفيرس بيبقي موجود في اللعاب بتاعه و من شروط ان تحصل عدوي ان لازم يحصل دخول للفيرس داخل الجلد بجانب الاعصاب الطرفيه.. لذلك الطريقه هي العض لازم الحيوان المسعور يعض علشان ينقل العدوي.
………..
طب هل في طرق تانيه يقدر يتنقل بيها السعار غير العض!؟
 بص هو في طرق تانيه لكنها نادره جدااا و صعب تتواجد عندنا هنا في مصر لانها تتطلب تواجد خفافيش و احنا معندناش هنا في مصر خفافيش الحمدلله
…………
طيب هل يا دكتور الفئران لو عضت الكلب بتاعي ممكن يجيله سعار ؟
 بص هو علميا طبعا ممكن يجيله سعار لكن واقعيا مفيش ولا حاله اتسجلت بكدا و كمان الفار اللي بيجيله سعار بيموت بسرعه جدا و مش بيستحمله خالص..
………..
طيب يا دكتور هو لو انا باكل ني او raw هو دا فيه خطر لو اللحمه دي جايه من بقره مسعوره ؟
 ايوه يافندم خطر و لو الكلب لسانه او فمه فيه جرح هايجيله سعار علشان كدا بنبه ديما انك تجيب اكل الكلب من مكان مضمون و لكن مجملا دا شئ نادر الحدوث فا متقلقش اكل ني و انت مطمن(و لوني لا افضل الاكل الني)  ..بس في حاجه حابين ننوه عليها لما تجيب نافق اغسلهم كويس جدا و اسلقهم كويس و ارمي الشربه بتاعتهم… علشان نضمن الي حدا ما جوده الفراخ.. بس االكلام دا ملوش دعون بالسعار
…………
طيب يا دكتور هو الفيرس دا لو موجود في الاكل اقدر اتخلص منه ازاي ؟
 بص يا سيدي فيرس السعار دا ضعييييف جدا رغم قوه اعراضه بمعني انه مش بيستحمل الفريزر بمجرد ما اللحمه تتجمد فتره بيموت او اللحمه تتغلي بيموت من الاخر الحراره بتاثر عليه جدا.
…………
طيب انا بلعب مع الكلب بتاعي و عضني و انا خائف يكون عنده سعار و يعديني!؟
اولا لازم اليفك يكون بيختلط ب حيوانات خارجيه او بيخرج عمتا فا لازم نقلق.. و لازم ناخد التحصين.. انما لو اليفك مبيخرجش اصلا و واخد تحصينه يبقي متقلقش
ثانيا مش معني ان الكلب عضك انه مسعور.. يمكن انت رخمت معاه في الهزار  بس دا ميمنعش ان في حاجه مهمه جدا لازم تعملها..  تغسل ايدك ب مياه و صابون كويس اوي و تغسل مكان العضه ب مياه و صابون كويس اوي..
انت هاتهزر معايا يا دكتور مياه و صابون ايه اللي يقضوا علي السعار…
طب اقولك معلومه ظريفه ان نسبه اصابتك بالسعار بتنخفض بنسبه 50% بمجرد غسل ايدك بالصابون لان الفيرس ضعيف جدا و الصابون بيجيبه الارض..
………….
انا مربي كلاب كتير يا دكتور هل دا هايفرق في حاجه ؟
ايوه اللي عنده اكتر من 5 كلاب بيبقي عرضه للسعار اكتر من غيره و لكن التحصين يحميك متقلقش بس دوره جي بعدين.
………..
شكلك كدا مش مقدر حجم اللي انا بتكلم فيه طيب بص معايا علي شويه الارقام اللي جايه دي و انت هاتعرف
*في اكتر من 27 الف حاله سعار سنويا بتتسجل ضد الحيوانات و دا رقم بسيييييط بالنسبه للحقيقي.
*منظمه الصحه العالميه بتقول ان في عدد بيتراوح بين 100 الف ل 150 الف حاله سعار بتتسجل سنويا للبني ادمين و طبعا كلهم بيموتوا… في حروب بيروح فيها ارقام اقل من كدا
*في اكتر من 10 مليون بني ادم بياخد التحصين الوقائي بتاع السعار اللي بناخدو بعد العضه دا كل سنه..
*من القوانين #الفيدرالية ل امريكا ان مينفعش يعدي علي الكلب سن 12 اسبوع غير لما ياخد تحصين السعار و لو صاحبه محصنهوش بيبقي مسائل مسائله فدراليه..
………………………….
ياااااه ايه دا كلوا طب ما تفهمني اكتر عن البتاع الفتاك دا و بيعمل ايه جوه الجسم!؟
بص يا سيدي الكلب بتاعك اتعض او انت اتعضيت..  بيجي الفيرس ياما يخش علي الاعصاب الطرفيه علي طول و يبدا رحلته ياما يقعد شويه في مكان العضه يرتاح كدا و ياخد تان و يتكاثر شويه ممكن يقعد بقي اسبوع او شهر في الكلاب و القطط او ممكن يوصل سنه في الانسان و الفتره دي بتبقي مصيبه لان مش بيبان فيها اي حاجه و الحيوان او الانسان بيبقي طبيعي و بعدين الفيرس يروح للعصب و يبدا رحلته لغايه ما يوصل للحبل الشوكي و المخ و اول ما بيوصل هناك بتبان الاعراض و اخرك اسبوعين و يكون الكلب متكل علي الله او انت نفسك تكون رحت عند رب كريم…
…………..
انت خوفتني يا دكتور طب هل دا بيتعالج طيب ؟
للأسف بالنسبه للحيوانات لا ملوش علاج.. لكن بالنسبه للبني ادمين في 5 حقن اول ما تتعض تروح تاخدهم علي طول في المستشفى في كتفك دول هاينجدوك باذن الله ….
………….
طب ايه الاعراض اللي لما أشوفها علي الكلب ابدا اشك ؟
 طبعا لازم الكلب يكون له تاريخ انه اتعض من حيوان تاني او مش متحصن ضد السعار طبعا..
بص دي الاعراض المبدايه.. زي
عدم القدره علي المضغ
الكلب بقي عصبي
قلقان علي طول
سخن شويه بس مش شرط
لو كان بيلعب ديما و حبوب كدا هتلاقيه بقي بيتكسف و بقي يحب يقعد لوحده
و لو هو بطبيعته شرس هتلاقيه بقي شرس اكتر بكتير..
و ديما عنيه هتلاقيه واسعه كدا
و المرحله دي بتقعد من يومين ل 3 قبل المرحله اللي اتاكد منها
………….
طب امتي اتاكد يادكتور و المفروض اتصرف ازاي ؟
هنا علشان نتاكد لازم نشوف المرحله التانيه و هي مرحله الجنون … و هتلاقي الكلب فيها
 ديما مش علي بعضه… عنده ردات فعل زياده جدا للاصوات و اي حاجه تتحرك قدامه..و ديما بينزل لعاب جامد علشان مش بيقدر يبلعه… مروش كدا و بيتنطط علي طول بطريقه غريبه… بيخاف من الضوء جدا و مش بيقدر يقف في الشمس… بيعضعض في اي حاجه قدامه… مبيقعدش ابدا ديما واقف… بياكل اي حاجه في وشه خصوصا الخشب.. لو سبته يمشي بيفضل يمشي في خط مستقيم مبيحودش ابدا..
 لما بتحبسه في قفص بيفضل يعضعض و يضرب في القفص.. عنده خلل في التوازن ديما… و من اهم العلامات تلاقيه بيخاف من المياه تيجي تحطله مياه تلاقيه بيقرب منها و مره واحده يبعد عنها… و بعدين يجيله تشنجات في شلل في موت…
……………..
طيب اتصرف ازاي يا دكتور ؟؟
 بص يا سيدي انت اول ما تلاقي الكلب عليه اعراض زي ديه او اعراض عصبيه عمتا احبسه علي طول و حطله الاكل و الشرب من بعيد و راقبه لمده شهر كامل لو مماتش يبقي تمام لو مات يبقي شكك في محله..
…………
و هل القطط نفس الكلام!
ايوه نفس الكلام بس في حاجه مميزه فيها ان صوتها بيتغير..
………….
طيب انا اقدر احمي نفسي و احمي الكلب بتاعي ازاي ؟؟
تحمي الكلب بتاعك عن طريق انك تديله تحصينات السعار الخاصه بيه و دي بتبقي عند سن 4 شهور بالنسبه للتحصين المستورد و 6 شهور بالنسبه لتحصين الهيئه او التحصين المصري و بعد ما تحصنه متشلش هم ابدا و بالنسبه لنفسك خد تحصيناتك برضوا و ان في مره شوفت الاعراض ذي علي كلبك و عضك تروح تاخد الحقن فورا…
……….
طب هل يا دكتور الكلب لو متحصن ممكن يجيله سعار ؟؟
لا متقلقش مش هايجيبوا بإذن الله
…………….
ربنا يبعد عنا و عنكم جميعا باذن الله
 الله ما ان كان توفيق فا من الله و ان كان فيه سهوا فا من الشيطان او مني فلا تنسوني من صالح دعائكم
Open chat
اهلاً كيف ممكن نخدمك